شغل البيت ازاي اخلصه بسرعة ومن غير ما حد يساعدني للبنات فقط

ناس كتير خاصا البنات المتجوزة جديد بتفتكر ان شغل البيت حاجة صعبة و مسئولية كبيرة، لكن الحقيقة ان شغل البيت ممكن كله يخلص بسرعة لو عرفتى تنظمى وقتك و تعملى جدول لكل حاجة زى كدة:

 

التنضيف و شغل البيت

المحافظة على نضافة بيتك سهل جدا حتى لو مفيش حد بيساعدك، ببساطة اعملى جدول تنضيف و التزمى بيه:
-جدول يومى:
*توضيب السرير
*غسيل فى الغسالة
*تنضيف المطبخ بعد الغدا
*تلميع سريع للشقة لو محتاجة
-جدول اسبوعى:
*تنضيف الشقة كلها و مسحها
*ممكن تنضفى و تمسحى غرفة واحدة كل يوم لو مش عايزة تنضفى الشقة كلها فى يوم واحد
*تغيير ملايات السرير
-جدول شهرى:
*كل شهر وضبى الدواليب و الادراج فى كل غرفة، مثلا فى يناير وضبى المطبخ و كل دواليبه و اغسلى كل الادوات لو محتاجة، و فى فبراير وضبى غرفة النوم و شوفى كل اللبس اللى مش محتجاه و اديه لحد فقير، و فى مارس وضبى كل الادراج و منيوهات الاكل اللى فى الليفنج و هكذا.
-كل 3-6 شهور:
*غسل السجاجيد والموكت

*غسل الستاير

 

تحضير الاكل

عشان تحضير الاكل مايخدش منك وقت كتير، كل يوم جمعة او سبت اعملى menu او قايمة بكل اكل الاسبوع و حضريه و شيليه فى الفريزر. مثلا تبلى الفراخ البانيه و شيليها متبلة، نضفى الفراخ الكاملة و شيليها مغسولة و جاهزة للطبخ، حضرى الكفتة بحيث تكون جاهزة للسوا و هكذا. كل ده لما تعمليه مع بعض مش هياخد منك وقت فى اول الاسبوع و هيوفر عليكى كتير فى الايام اللى بعد كدة.

 

 

 

المشتروات

-اكتبى كل حاجة ممكن البيت يحتاجها فى ورقة و قسميها بالشكل ده:
*ادوات تنضيف
*بقالة
*ادوات مكتبية
*خضروات
*فواكه
*منتجات البان
*توابل
*بقوليات
*لحوم و اسماك
*مجمدات
*منتجات شخصية
*مشروبات
*مخبوزات
*اشياء اخرى
-كل اول شهر اشترى كل اللى هتحتاجيه للشهر كله زى المكرونة و الرز و البقالة و اللحمة و الفراخ و الحاجات اللى صلاحيتها طويلة. خلى عندك ورقة على التلاجة اكتبى فيها كل حاجة لما تخلص او لو قربت تخلص عشان تجمعى كل اللى هتحتاجيه على اول الشهر و ممكن تطبعى اللستة اللى عملتيها فى الاول و تعملى علامة صح جنب الحاجات اللى هتشتريها.
-كل اول اسبوع اشترى الخضار و الفاكهة و الالبان للاسبوع كله عشان متحتاجيش تنزلى اكتر من مرة.

 

 

 

 استخدمى وقت شغل البيت بذكاء

-مش كل حاجة تحتاجيها تنزلى تشتريها، دلوقتى ممكن تجيبى معظم طلبات البيت من اى مكان بخدمة ال home delivery او التوصيل للبيت زى الادوية، البقالة، الخضار و الفاكهة، اللحمة و الفراخ او حتى العيش. (لو الخدمة متاحة فى المحلات اللى بتشترى منها).
-استغلى اليوم اللى هتشترى فيه طلباتك و حضرى اكل الاسبوع قبل ما تدخليه الفريزر و اغسلى الخضار كويس و شيليه نضيف.
-شغلى الغسالة قبل ما تبدأى شغل البيت او الطبخ عشان لما تخلصى اللى وراكى تخرجى الغسيل على طول.
-حضرى الاكل كل مع بعضه مش حاجة حاجة، ابدأى بالحاجة اللى هتاخد وقت زى اللحوم مثلا و لحد ما تستوى جهزى باقى الاكل.
-بما ان شغل البيت مش بيحتاج مجهود ذهنى فممكن تعملى حاجات تانية و انتى بتطبقى الغسيل مثلا زى انك تكلمى اهلك و اصحابك او تتفرجى على التليفزيون.

 

حفزى نفسك

-حاولى تخلصى شغل البيت بسرعة عشان تلاقى وقت تعملى الحاجات اللى انتى بتحبيها.
-شغلى موسيقى او الاغانى اللى بتحبيها و انتى بتعملى شغل البيت او بتطبخى عشان متحسيش بزهق.
-رشى فى البيت معطر جو بعد ما تخلصى تنضيف او ولعى شمع بتحبى ريحته عشان تحسى ان البيت بقى اجمل.
-حددى لنفسك مكافأة معينة بعد يوم طويل من التنضيف و شغل البيت، مثلا مج نسكافيه و انتى بتقرى كتاب او مجلة، او حمام دافى و انتى بتسمعى موسيقى و مولعة شمع ;)