في بنات كتير مش بتعرف تسلي اطفالهم بطريقة كويسة جبتلكم افكار جديدة تقدري تسلي بيها طفلك بطريقة جميلة ومفيدة
تابعي المقالة دي مهمة جدا
الطريقة الاولي
الرسم و التلوين
ممكن تجيبي كتب التلوين العادية و ممكن تطبعى رسومات من على الانترنت.
و انتى قاعدة بتلونى معاه , ابتدى اسئليه عن اسم اللون اللى ماسكه بالعربى
أو الانجليزى. و لو سنه يسمح ممكن تطلبي منه يكتبه فى ورقة.
خلى وقت الرسم و التلوين مش وقت تقليدى. اطلبى منه مرة يرسم رسمة و هو مغمض
عينه, أو يرسم حاجة شافها فى البيت أو فى الحضانة مثلا, حاجة بيحبها زى
أكلة أو شخصية كارتون أو ممكن حتى لعبة عنده تجبيهاله و هو يحاول يرسمها.
الطريقة التانيه
القصص
متكتفيش فى وقت القصص ان انتى بس اللي بتحكيله فيه. خليه هو كمان
يحيكلك, اسئليه عن يومه كان عامل ازاى, اطلبى منه قصة مضحكة, قصة عن حد من
صحابه أو قرايبكوا أو اسئليه عايز تعمل ايه لما تكبر.
جربي مرة تقوليله ان انتوا اللى هتألفوا قصة و هاتى اسكتش و ألوان و أقلام.
و اسئليه عايزاها عن ايه و اسمها ايه و مين الأبطال و ساكنين فين و شكلهم
ازاى , و أقعدوا ارسموا اللى بيقوله و لو مبيعرفش يكتب أوى , اكتبى انتى و
خليه كل فترة يكتب لو كلمة بيسطة.
و لما تخلصوا خليه يحكيهالك أو يحكيها لباباه أو حد من صحابه أو العيلة مثلا.
الطريقة الثالثة
ترويق الأوضة
لما يبقي طفلك زهقان , اقترحي عليه انكوا تروقوا الأوضة. خليه يتعلم انه يعتمد على نفسه و يساعدك.
فهميه ان كل مرة هيروق الأوضة, هيلاقي حاجة كانت ضايعة منه او ناسيها.
الطريقة الرابعة
الصلصال
الصلصال بيتباع فى المكتبات. و انتوا بتشكلوه , اعملوا أشكال حيوانات أو
أرقام أو أى حاجة من اللى هو بيتعلمها فى المدرسة أو الحضانة , و طول ما
هو بيلعب بيهم اسئليه عليهم. كده المعلومات هتثبت عنده أسرع و يفضل فاكرها و
ترتبط المذاكرة عنده باللعب و ان مش كل المذاكرة مملة.
الطريقة الخامسة
الرياضة
يفضل تخلى طفلك يدرب أى رياضة هو بيحبها , عشان صحته و عشان يضيع وقته فى حاجة مفيدة.
لما يبقى زهقان فى البيت , قوليله يفرجك الحركات اللي بيتعلمها فى النادى أو اعملوا مع بعض تمرينات بسيطة لمدة 15 دقيقة.
و لو متعرفيش اى تمرينات , استعينى بالYoutube , هتلاقى عليه فيديوهات كتير.
الطريقة السادسة
لعبة Connect four
الconnect four من الألعاب السهلة و مناسبة نوعا ما للسن الصغير و
هتساعد طفلك على تقوية ذاكرته و هينبسط لما تشاركيه انتى أو حد كبير سواء
والده أو حد من العيلة باللعب.
الطريقة السابعة
لعبة السلم و الثعبان
و لو هو كبير شوية , يبقى ممكن تلعبوا اللعب اللى فيها زهر و كروت زي بنك الحظ و Monopoly و غيرها.
الطريقة الثامنة
لعبة puzzle
اما الpuzzle فمناسب تقريبا لمعظم الأعمار بعد طبعا ما يكون عمره عدى
مرحلة انه ممكن يمسك القطع و يبلعها , و مدى مناسبته بيبقى على حسب عدد
القطع بتاعته.
خدى بالك من عدد قطع الpuzzle و هاتيله واحد مناسب لسنه. و ممكن تجبيله واحد أصعب شوية بعدد قطع أكبر, بس تساعديه فيه.
الpuzzle برده هيساعد طفلك انه يقضى وفت طويل و ينمى ذكائة و ذاكرته.
الطريقة التاسعة
افكار الفنون و الابداعات
الوقت ده هيبقى من أكتر الأوقات اللى انتى شخصيا هتسمتعي بيها, كل
الألوان و القص و اللزق و الخرز و الخامات و انتوا تعملوا حاجات يعلقها فى
أوضته أو ممكن تقوليله يلا نعمل هدية لحد من صحابك أو حد من العيلة.
الأنشطة دى هتوسع مداركه بشكل كبير و تخليه يتعرف على خامات كتير و برده ممكن تعودى تسئليه على الألوان و الأشكال و انتوا شغالين.
و ممكن جدا تعملوا حاجات من اللي بيدرسها و تعليقهاله فى الأوضة.
و لو برده معندكيش أى أفكار , استعينى بالانترنت و حتى الYoutube هتلاقي
عليه فيديوهات بكل خطوات التنفيذ , ده غير ان فيه كتب فى المكتبات بتكون
مخصوصة و فيها أفكار كتير.
الطريقة العاشرة
العاب المطبخ
دخليه معاكى المطبخ و خليه واقف جنبك و انتى بتعمليله أكلة بيحبها.
خليه يشوف قد ايه انتى بتتعبى عشان الأكل يتعمل و نبيهه مثلا أن النار مضرة
و عرفيه على مكونات الأكلة , و لو ينفع يعمل حاجة بسيطة خليه يعملها.
بالذات لو عندك بنت, هيكون حلو انك تعوديها على فكرة الوقوف فى المطبخ.
الطريقة الحادية عشر
العاب التجميل
الوقت ده كمان هيكون أحسن لو عندك طفلة بنت. لما تبقى زهقانة قوليلها
تعالى نسرح شعرنا و لو عندها عروسة فيها شعر خليها تسرحلها هى كمان. ممكن
تحط زبدة كاكاو, perfume او nail polish كمان. و لو ولد يبقى أكيد هيسرح
شعره و يحط perfume بس.
الطريقة الثانية عشر
علمية معلومات جديدة
معظم الأطفال اليومين دول بقوا بيقضوا وقت طويل على الكمبيوتر و الانترنت.
خصصي وقت يكون للمعلومات و تستخدموا النت سوا عشان تتعرفوا علي حيوان , بلد , لغة جديدة.
و لو سنه لسه موصلش للمرحلة دى , يبقى احرصى انتى كل يوم انك تنميله معلوملته و تقوليله معلومات جديدة.
الطريقة الثالثة عشر
الصور
فرجي طفلك علي صور أفراد العيلة و أعدي اسئليه مين ده و مين ده. اتأكدى انه عارف معظم افراد العيلة و اساميهم و صلة قرابتهم.
فرجيه كمان صوره و هو فى مرحلة عمرية أصغر و أول ما اتولد.
الطريقة الرابعة عشر
الزرع
هاتى لطفلك زرعة منزلية صغيرة و علميه يسقيها و يهتم بيها. أو ازرعوا قطن أو عدس في قطنة.
و كل ما يقول زهقان. اقترحي عليه انه يقوم يتفرج على زرعته و يوشوفها كبرت
الطريقة الخامسة عشر والاخيرة
اخترعى ألعاب
ممكن انتى تفكرى فى حاجات يعملها , زى مثلا انك تقوليله دور فى البيت على حاجات بتبدأ بحرف معين, أو تعالى نفكر فى كل الحيوانات اللى لونهم أسود أو اللى لونهم أبيض , عد مثلا فى كام رف فى أوضتك , فى كام ملعقة فى المطبخ و هكذا.
أهم حاجة تخلى ذهن طفلك دايما حاضر و باله مشغول بحاجة تسليه و كمان تفيده.
منقول
إرسال تعليق
اعلم ان الله يراك ♥