الثقة هنا مش معناها بس فى كلامك, لكن فى تصرفاتك كمان.
خليكي واثقة فى اللى بتعمليه مهما كان. و افتكرى دايما ان فيه ناس وظيفتها فى الحياة بس انها تحبط اللى حواليها. انتى بقى عليكى انك تثبيلهم انهم غلط. و إن حصل و طلعتى انتى اللي غلط. خليكى شجاعة و اعترفى بده و تحملى نتايج قرارتك و دورى هتصلحيه ازاى.
اتبعى دايما حاستك السادسة (اللى عند كل البنات و مش بيعرفوا يفسروها, لكن هى مجرد احساس بيجيلك و عادة بيكون صح) و متسمعيش غير كلام الناس اللى بتثقي فيهم و احيانا بيبقى المفروض متسمعيش كلام حد خالص و تكوني شجاعة بالقدر الكافى و تاخدى قرارك لوحدك.
فكرى كويس و أوزنى أمورك قبل أى كلام هتقوليه أو قرار هتاخديه, و رتبى كلامك و خطواتك. و تلاقئيا هتلاقى نفسك بتكلمى بأسلوب حلو و منسق, يجذب ليكى اللى بيسمعك. و قرارتك بقت مناسباكى انتى و بتساعدك تتقدمى فى مشوراك.
أعملى أهدافك و رؤيتك الخاصة مفيش احسن من بنت عارفة هى عايزة ايه.
فكري كويس انتى نفسك فى ايه, و اسألى نفسك السؤال اللى بيتسئل فى كل مقابلات الشغل و هو “شايفة نفسك فين كمان عشر سنين” بس المرة دى جاوبى عليه بجد. فكرى عايزة تبقى ايه و فين و اشتغلى على هتوصلى للأهداف دى إزاى و إزاى تستغلى كل امكانياتك و الحاجات اللى متاحة حواليكى عشان توصلى للهدف ده.
دوّري على قدوة
دوّرى على حد شايفة نفسك فيه فى المستقبل.
مش شرط حد واحد, ممكن كذا حد و ممكن ناس من أهلك او اقرايبك مش لازم ناس مشهورة. شوفيهم بيعملوا ايه و بيفكروا ازاى. اعرفي سيرتهم الذاتية و ده ممكن بسهولة من ويكيبيديا لو هما ناس مشهورة و شوفى و هما فى سنك كانوا بيعملوا ايه و وصلوا لفين فى مشوارهم.
و لو حاسة ان مفيش حواليكى حد او مش عارفة توصلى. اقري كتب , اتفرجى علي أفلام, شوفى فنانين معروفين باتجاهات أو وجهات نظر معينة أو مؤلفين كتب , عازفين, رسامين أو أى فئات تانية.
خليكى غنية
غنية هنا مش معناها فلوس, غنية هنا جاية من غنى الفكر.
اقرى كتير و اعرفى حاجات متنوعة. خلى اللى يتكلم معاكى يحس انك عارفة حاجات كتير و فاهمة فى مجالات مختلفة. اللى هيوصلك لده هي القراءة و تصفح الانترنت بشكل مستمر و فى مواقع مختلفة, و أكيد فيه طرق تانية كمان بس بتختلف من بنت للتانية.
كمان اعتمدى على نفسك فى معظم أمورك و اتعلمى تعملى حاجاتك لنفسك, أكيد مش كل حاجة و اكيد فيه ناس هتساعدك كتير , بس استقلالك هو جزء من قوة شخصيتك متستهنيش بيه.
أهتمى بمظهرك الخارجى و نظافتك الشخصية
زى ما لازم تهتمى بثقافتك و فكرك. لازم كمان تهتمى بمظهرك الخارجى.
بُصى لنفسك فى المراية, و شوفى انتى راضية عن نفسك و لا لأ. لو لقيتى نفسك مبسوطة , فتأكدى ان ده بينعكس على نفسيتك و على الناس. يعنى لو انتى شوفتى نفسك حلوة , الناس هتشوفك حلوة و العكس صحيح. عشان كده لو لقيتى نفسك مش راضية عن مظهرك لأى سبب من الأسباب, غيريه. يعنى لو حسيتى ان وزنك زايد, متتردديش انك تمارسى رياضة او دايت أو مثلا لو مكنش عاجبك style لبسك , ابدأى شوفى فى المحلات styles جديدة و اسألى مثلا بنات تانية بتجبى طريقة لبسهم و هكذا , لحد ما تبصى فى المراية و تلاقى نفسك مبسوطة باللى شايفاه.
كمان متنيسش نظافتك الشخصية و خدى بالك من الحاجات الصغيرة زى غسيل الأسنان, تنظيف الأظافر و رش العطور.
الحاجات الصغيرة دى هتخليكى مرتاحة و مش هتخليكى قلقانة ان حد ياخد باله من حاجة مش حلوة فيكى.
و افتكرى انك حتى لو مش شايفة نفسك جميلة أوى أو جذابة , فالحاجات دى بتخليكى جذابة.
أخرجي بره الدايرة
دايرة الجواز و الخطوبة و فتى الأحلام.
يعنى لو انتى مش مرتبطة, بطلى تدوري “عليه” و تستنيه و توقفى حياتك عليه. بلاش كلمة “لما هتجوز هعمل كذا” أو “لما ارتبط هخليى يودينى كذا” , لو عايزة حاجة فعلا اعمليها انتى و لو عايزة تروحى مكان معين مستننيش حد يودهولك و روحيه انتى مع صحابك أو أهلك.
جايز ده يكون صعب شوية و خاصة مع بعض الأهالى ,لكنه مش مستحيل و أكيد انتى دلوقتى بقيتى صاحية شخضية قوية كفاية عشان تعملى اللى انتى عايزاه.
اما بقى لو انتى مرتبطة, فبلاش تخليه هو كل محور حياتك. بلاش كلامك كله يبقى معاه أو عليه و بلاش تخلى كل أهدافك تروح لناحية الجواز و البيت و بس.
من الأخر كده, خلى الراجل جزء من حياتك , لكن مش حياتك كلها. هو جزء مهم و أكيد بيساعد. لكن عدمه ميخيليش ابدا حياتك تقف.
اكبرى من فكرة ان حياتك راجل, حتى لو مجوزة و حتى لو ست بيت. اعملى دايرتك الخاصة بيكى و “هو” ميبقاش فيها و حتي لو كانت الدايرة دى صغيرة, المهم تكون موجودة.
حسبي الله ونعم الوكيل في اللي كاتب الكلام دة
ردحذف